Page 112 - Dârülmülk Konya Dergisi 2024 5. Sayı
P. 112
İ.EV.20-42-1
Şûrâ-yı Devlet
Maliye Dairesi
Aded: 2472
Evkâf-ı Hümâyûn Nezâreti’nin Şûrâ-yı
Devlet’e havâle buyurulan 28 Cumâde’l-
ahire sene 1316 tarih ve beş yüz seksen
altı numaralı takrîri melfûfuyla Mâliye
Dairesi’nde kırâet olundu.
Meâlinde, Evkâf-ı mazbûtadan Konya’da kâin
Şeyh Sadreddin-i Konevî hazretleri Câmi‘-i
şerîfi’nin muhtâc-ı ta‘mîr olmasına mebnî
mahallince icrâ kılınan keşif ve münâkasasını
mübeyyin tanzîm olunan melfûf defterle
pusulaya nazaran ta‘mîrât-ı mukteziye Mecidî
yirmi guruş hesâbıyla yirmi altı bin yedi yüz
guruşda müte‘ahhidi uhdesinde takarrür
etmiş ise de ta‘mîrât-ı mezkûrenin maktû‘an
icrâsından emâneten icrâsı vakfı hakkında enfa‘
ve evlâ idüğü beyânıyla icrâ-yı îcâbı Konya
vilâyeti İdâre Meclisi’nden bâ-mazbata iş‘âr
olunmuş ve câmi‘-i şerîf-i mezkûr vakfının a‘şâr
hâsılâtından hazînedeki mevcûdu masârıf-ı
ta‘mîriye-i mezkûreyi tesviyeye kâfî bulunmuş
olduğundan bahisle ta‘mîrât-ı mezkûrenin
emâneten icrâsı için meblağ-ı mezbûrdan
gayr-ı ez fark-ı akçe yirmi beş bin üç yüz altmış
beş guruşun vakfı vâridâtından olmak üzere
mahallî hâsılât-ı vakfiyesinden olarak üç yüz on
dört senesi büdçesi dâhilinde tesviyesi istîzân
olunmuş ve sûret-i iş‘âr münâsib görünmüş
olduğundan ber-mûceb-i istîzân icrâ-yı îcâbının
nezâret-i müşârun-ileyhâya havâlesi tezekkür
ve keşif defteriyle münâkasa pusulası leffen
takdîm kılındı. Ol bâbda emr u fermân hazret-i
men lehü’l-emrindir.
Fî 29 Receb sene 1316 ve fî 1 Kânûn-ı evvel
sene 1314
[Şûrâ-yı Devlet Maliye Dairesi Azalarının
mühürleri]
110