Page 116 - Dârülmülk Konya Dergisi 2024 5. Sayı

İ.EV.23-24-1

Şûrâ-yı Devlet
Maliye Dairesi
Aded: 1441
Evkâf-ı Hümâyûn Nezâreti’nin Şûrâ-yı
Devlet’e havâle buyurulan 2 Rebî‘ulâhir sene
1317 tarih ve üç yüz kırk dokuz numaralı
takrîri Mâliye Dairesi’nde kırâet olundu.

Meâlinde Konya’da kâin olup keşfi
mûcebince yirmi beş bin üç yüz altmış beş
guruş sarfıyla emâneten ta‘mîri muktezâ-yı
irâde-i seniyyeden olan Şeyh Sadreddin-i
Konevî hazretleri câmi‘-i şerîfinin ikmâli
mahallince tanzîm ve irsâl kılınan defteri
mûcebince daha on sekiz bin dört yüz
doksan yedi guruşun sarfına mütevakkıf
olduğu beyânıyla icrâ-yı îcâbı mahallinden
bâ-mazbata iş‘âr olunmuş ve mezkûr on
sekiz bin küsür guruşun sarfı keşif defterine
nazaran lüzûm-ı sahîha müstenid bulunduğu
anlaşılmış olduğundan bahisle ta‘mîrât-ı
mezkûrenin keşfinden noksânıyla ve kemâl-i
metânet ve rasânetle icrâsı zımnında
komisyon-ı mahsûs ma‘rifetiyle ikmâli için
zikr olunan meblağdan hamiyetmendân ahâlî
taraflarından i‘âneten cem‘ olunan üç bin
guruş ile akçe farkı bi’t-tenzîl bâkî on dört
bin yedi yüz yirmi iki guruşun üç yüz on beş
senesi büdçesi dâhilinde sarfı istîzân olunmuş
ve sûret-i iş‘âr münâsib görünmüş olmağla
ber-mûceb-i istîzân icrâ-yı îcâbının nezâret-i
müşârunileyhâya havâlesi tezekkür ve zikr
olunan keşif defteri leffen takdîm kılındı.
Ol bâbda emr u fermân hazret-i men lehü’l-
emrindir.
Fî 6 Cumâde’l-ûlâ sene 1317 ve fî 31 Ağustos
sene 1315

[Şûrâ-yı Devlet Maliye Dairesi Azaları
Mühürleri]

114