Page 114 - Dârülmülk Konya Dergisi 2024 5. Sayı
P. 114
BEO.1248-93555
Sadâret Mektûbî Kalemi
Tarih: 17 Kânûn-ı Evvel 1314
Evkâf-ı Hümâyûn Nezâret-i
Celîlesi’ne
Sûretleri bâlada muharrer
tezkire-i ma‘rûza ve şeref-sâdır
olan irâde-i seniyye-i cenâb-ı
hilâfetpenâhîyi mübellağ hâmiş
ve leffen i‘âde kılınan keşif
defteriyle münâkasa pusulası
mûcebince Evkâf-ı Hümâyûn
Nezâret-i Celîlesi’nden îfa-
yı muktezâsına himmet
buyurulmak.
Konya’da dâin Şeyh Sadreddin-i Konevî hazretleri câmi‘-i şerîfinin masârıf-ı ta‘mîriyesi
hakkında.
Atûfetlü Efendim Hazretleri
Evkâf-ı mazbûtadan Konya’da kâin Şeyh Sadreddin-i Konevî hazretleri Câmi‘-i
şerifi’nin muhtâc-ı ta‘mîr olan mahallerinin keşfi mûcebince Mecidî on dokuz guruş
hesâbıyla yirmi beş bin üç yüz altmış beş guruşla emâneten icrâ-yı ta‘mîri ve meblağ-ı
mezkûrun mevcûd-ı vakıfdan sarf olunmak üzere üç yüz on dört senesi büdçesi
dâhilinde tesviyesi husûsunun Evkâf-ı Hümâyûn Nezâret-i Celîlesi’ne havâlesi
hakkında Şûrâ-yı Devlet Maliye Dâiresi’nin mazbatası melfûfuyla arz ve takdîm
olunmağla ol bâbda her ne vechile irâde-i seniyye-i cenâb-ı hilâfetpenâhî şeref-
müte‘alik buyurulur ise mantûk-ı âlîsi infâz edileceği beyânıyla tezkire-i senâverî terkîm
kılındı efendim.
Fî 10 Şaban sene 1316 ve fî 12 Kânûn-ı evvel sene 1314
Sadrazam Rıfat
Ma‘rûz-ı çâker-i kemîneleridir ki
Resîde-i dest-i ta‘zîm olup melfûfâtıyla manzûr-ı âlî buyurulan işbu tezkire-i seniyye-i
sadâretpenâhîleri üzerine mûcebince irâde-i seniyye-i hazret-i hilâfetpenâhî şeref-sudûr
buyurulmuş olmağla olbâbda emr u fermân hazret-i veliyyü’l-emrindir.
Fî 11 Şa‘bân sene 1316 ve fî 13 Kânûn-ı evvel sene 1314
Serkâtib-i Hazret-i Şehriyârî
Tahsin
112