Page 115 - Dârülmülk Konya Dergisi 2024 5. Sayı
P. 115
ŞD.147-3
Nezâret-i Evkâf-ı Hümâyûn
Mektûbî Kalemi
Aded: 586
Evkâf-ı mazbûtadan Konya’da kâin Şeyh
Sadreddin-i Konevî hazretleri Câmi‘-i
şerifi’nin muhtâc-ı ta‘mîr olmasına
mebnî mahallince icrâ kılınan keşif ve
münâkasasını mübeyyin tanzîm ve leffen
takdîm olunan defterle pusulasına nazaran
ta‘mîrât-ı mukteziye mecidî yirmi guruş
hesâbıyla yirmi altı bin yedi yüz guruşda
müte‘ahhidi uhdesinde takarrür etmiş ise de
ta‘mîrât-ı mezkûrenin maktû‘an icrâsından
emâneten icrâsı vakfı hakkında enfa‘ ve
evlâ idüğü beyânıyla icrâ-yı îcâbı Konya
vilâyeti idâre meclisinden bâ-mazbata
iş‘âr olunmuş ve câmi‘-i şerîf-i mezkûr
vakfının a‘şâr hâsılâtından hazînedeki
mevcûdu masârıf-ı ta‘mîriye-i mezkûreyi
tesviyeye kâfî bulunmuş olduğundan kâ‘ide-i
tasarrufâta bi’r-ri‘âye keşfinden noksânıyla
ve kemâl-i metânet ve rasânetle vücûda
getirilmeğe sa‘y u gayret olunmak üzere
ta‘mîrât-ı mezkûrenin emâneten icrâsı için
meblağ-ı mezbûrdan gayr-ı ez fark-ı akçe
yirmi beş bin üç yüz altmış beş guruşun
vakfı vâridâtından olmak üzere mahallî
hâsılât-ı vakfiyesinden olarak üç yüz on dört
senesi büdçesi dâhilinde sarfına me’zûniyet
i‘tâsı zımnında keyfiyetin huzûr-ı sâmî-i
cenâb-ı sadâretpenâhîlerine arzı masârıfât
idâresinden ifâde olunmağın ol bâbda emr u
fermân hazret-i veliyyü’l-emrindir.
Fî 28 Cumâde’l-âhire sene 1316 ve fî 12
Teşrîn-i sânî sene 1314
Nazır-ı Evkâf-ı Hümâyûn
Abdullah Galib
113