Page 120 - Dârülmülk Konya Dergisi 2024 5. Sayı

ŞD.184-11

Nezâret-i Evkâf-ı Hümâyûn
Mektûbî Kalemi
Aded: 378
Konya’da defîn-i hâk-ı ıtırnâk olan Şeyh
Sadreddin-i Konevî hazretleri türbesinin
ta‘mîri şeref-sudûr buyurulan irâde-i
seniyye-i cenâb-ı hilâfetpenâhî iktizâ-yı
âlîsinden bulunduğu Mâbeyn-i Hümâyûn-ı
Mülûkâne Başkitâbet-i Celîlesi’nden bâ-
tezkire-i husûsiye iş‘âr kılınması üzerine sebk
eden teblîgâta cevâben mezkûr türbenin
keşfinden yüz seksen dokuz guruş noksânına
olmak üzere yirmi yedi bin guruşla ta‘mîri
müte‘ahhidi uhdesinde takarrür eylemiş ise de
böyle yüz seksen küsür guruş kadar cüz’î bir
tenzîl ile ta‘mîrâtın müte‘ahhide ihâlesinden
ise bir komisyon ma‘rifetiyle emâneten icrâsı
menfa‘at-i vakıf nokta-i nazarından mûceb-i
muhassenât olacağı Konya vilâyetinden
gelen mazbatada bildirilmesi üzerine lede’t-
tedkîk vakf-ı mezkûrun evkâf-ı mazbûtadan
olduğu ve masârıf-ı ta‘mîriyeye kâfî vakfın
vâridâtı bulunduğu anlaşılmış olduğundan keşfinden noksânıyla ve kemâl-i metânet
ve rasânetle vücûda getirilmeğe sa‘y ve gayret olunmak üzere ta‘mîrât-ı merkūmenin
mahallince teşkîl olunacak bir komisyon ma‘rifeti ve evkâf muhâsebecisi nezâret ile
emâneten icrâsı ve masârıf-ı keşfiye Mecidî yirmi guruş hesâbıyla olduğu cümle-i
iş‘ârâtdan olmasına mebnî bin üç yüz elli dokuz buçuk guruş mecidî farkının bi’t-tenzîl
mütebâkî yirmi beş bin sekiz yüz yirmi dokuz buçuk guruşun vakfı vâridâtından ve
sene-i hâliye büdçesinden sarfına me’zûniyet i‘tâsı zımnında keyfiyetin huzûr-ı ma‘âlî
mevfûr-ı cenâb-ı sadâretpenâhîlerine arzı masârıfât idâresinden ifâde ve keşif defteri
leffen takdîm olunmağın ol bâbda emr u fermân hazret-i veliyyü’l-emrindir.

Fî 25 Cemaziyelâhire sene 1325 ve fî 23 Temmuz sene 1323
Müsteşar-ı Sadr-ı Alî
Ve Evkâf-ı Hümâyûn Nâzır Vekîli
Mehmed Ali

118