Page 123 - Dârülmülk Konya Dergisi 2024 5. Sayı
P. 123
İ.EV.45-64-2
Bâb-ı Âlî
Daire-i Sadâret
Amedî-i Dîvân-ı Hümâyûn
3149
Devletlü efendim hazretleri
Evkâf-ı Hümâyûn Nezâreti Vekâlet-i
Celîlesi’nin Şûrâ-yı Devlet’e havâle olunan
takrîri üzerine Maliye Dâiresi’nden kaleme
alınıp leffen arz ve takdîm kılınan mazbatada
Konya’da defîn-i hâk-ı ıtırnâk olan Sadreddin-i
Konevî hazretleri türbe-i şerîfesinin ber-
mantûk-ı emr u fermân-ı hümâyûn-ı cenâb-ı
hilâfetpenâhî icrâsı lâzım gelen ta‘mîrâtının
bedel-i keşfinden noksânıyla ve kemâl-i
metânet ve rasânetle ikmâline sa‘y olunmak
üzere mahallince teşkîl kılınacak bir
komisyon ma‘rifeti ve evkâf muhâsebecisi
nezâreti ile emâneten icrâsı ve Mecidî on
dokuz guruş hesâbıyla masârıf-ı ta‘mîriye olan
yirmi beş bin sekiz yüz yirmi dokuz buçuk
guruşun sene-i hâliye büdçesi miyânında vakfı
vâridâtından tesviyesi husûsunun nezâret-i
müşârun-ileyhâya havâlesi gösterilmiş olmağla ol bâbda herne vechile irâde-i seniyye-i
hazret-i hilâfetpenâhî şeref-sünûh ve sudûr buyurulur ise mantûk-ı münîfi infâz
edileceği beyânıyla tezkire-i senâverî terkîm kılındı efendim.
Fî 8 Şevval sene 1325 ve fî 1 Teşrîn-i sânî sene 1323
Sadrazam
Ferid
Ma‘rûz-ı çâker-i kemîneleridir ki
Resîde-i dest-i ta‘zîm olup melfûflarıyla berâber manzûr-ı âlî buyurulan işbu tezkire-i sâmiye-i
sadâretpenâhîleri üzerine mûcebince irâde-i seniyye-i cenâb-ı hilâfetpenâhî şeref-müte‘allik
buyurulmuş olmağla ol bâbda emr u fermân hazret-i veliyyü’l-emrindir.
Fî 13 Şevval sene 1325 ve fî 6 Teşrîn-i sânî sene 1323
Serkâtib-i Hazret-i Şehriyârî
Tansin
121