Page 122 - Dârülmülk Konya Dergisi 2024 5. Sayı
P. 122
İ.EV.45-64-1
Şûrâ-yı Devlet
Maliye Dairesi
Aded: 2186
Evkâf-ı Hümâyûn Nezâreti Vekâleti’nin Şûrâ-
yı Devlete havâle buyurulan 25 Cumâde’l-
âhire sene 1325 tarihli ve üç yüz yetmiş sekiz
numaralı takrîri melfûfuyla Maliye Dairesi’nde
kırâet olundu.
Meâl-i takrîrde Konya’da defîn-i hâk-ı ıtırnâk
olan Şeyh Sadreddin-i Konevî hazretleri
türbesinin ta‘mîri şeref-sudûr buyurulan
irâde-i seniyye-i cenâb-ı hilâfetpenâhî iktizâ-
yı âlîsinden bulunduğu Mabeyn-i Hümâyûn-ı
Mülûkâne Başkitâbet-i celîlesinden bâ-
tezkire-i husûsiye iş‘âr kılınması üzerine
bi’l-muhâbere Konya Vilâyeti’nden gelen
mazbatada sebk eden teblîgâta cevâben
mezkûr türbenin keşfinden yüz seksen dokuz
guruş noksânına olmak üzere yirmi yedi
bin guruşla ta‘mîri müte‘ahhidi uhdesinde
takarrür eylemiş ise de böyle cüz’î bir tenzîl
ile ta‘mîrâtın müte‘ahhide ihâlesinden ise
bir komisyon ma‘rifetiyle emâneten icrâsı
menfa‘at-i vakıf nokta-i nazarından mûceb-i muhassenât olacağı beyân kılınmış
olduğundan keşfinden noksânıyla ve kemâl-i metânet ve rasânetle vücûda getirilmeğe
sa‘y ve gayret olnumak üzere ta‘mîrât-ı merkūmenin mahallince teşkîl olunacak bir
komisyon ma‘rifeti ve Evkâf Muhâsebecisi nezâreti ile emâneten icrâsı ve masârıf-ı
keşfiyesinden Mecidî farkı bi’t-tenzîl yirmi beş bin sekiz yüz yirmi dokuz buçuk
guruşun vakfı vâridâtından ve sene-i hâliye büdçesinden sarfı istîzân kılınmışdır.
Zikr olunan türbenin ta‘mîri esâsen emr u fermân-ı hümâyûn-ı cenâb-ı pâdişâhî
muktezâ-yı celîlinden bulunduğu ve masârıf-ı ta‘mîriyesinin tesviyesine vakfın vâridâtı
kâfî idüğü anlaşılmış ve ta‘mîrât-ı merkûmenin şerâit-i muharrere dâiresinde olmak
üzere komisyon-ı mahsûs ma‘rifetiyle emâneten icrâsı dahi muvâfık-ı nizâm görünmüş
olmağla ber-mûceb-i istîzân îfâ-yı muktezâsının nezâret-i müşârunileyhâya havâlesi
tezekekkür ve keşif defteri leffen takdîm kılındı. Ol bâbda emr u fermân hazret-i men
lehü’l-emrindir.
Fî 14 Ramazan sene 1325 ve fî 8 Teşrîn-i sânî sene 1323
[Şûrâ-yı Devlet Maliye Dairesi Azalarının mühürleri]
120